.png)
Ամեն տարի աշնան և ձմռան ամիսներին նկատվում է սուր շնչառական վիրուսների ակտիվացում։ Այս տարի գրիպից, Քովիդից բացի նաև այլ վիրուսներ են տարածված՝ փսխում, փորլուծություն, սրտխառնոց։
«Միքայելյան» համալսարանական հիվանդանոցի Ինֆեկցիոն բաժանմունքի ղեկավար, ԵՊԲՀ ինֆեկցիոն հիվանդությունների ամբիոնի վարիչ, բժիշկ-ինֆեկցիոնիստ Վիգեն Ասոյանը «Հրապարակ»-ի հետ զրույցում անդրադարձել է այս սեզոնին տարածված վիրուսներին՝ ինչպես դիմակայել դրանց, որ դեպքում դիմել բժշկի, ինչ կանխարգելիչ միջոցառումներ կարելի է ձեռնարկել։
Մի քանի կարևոր մտքեր Վիգեն Ասոյանի հարցազրույցից։
- Մի փոքր նվազել է ծանր ընթացքով քովիդի հիվանդությունը, փոխվել է նաև շրջանառվող շտամի տեսակը, կան հիվանդներ, կան ծանր ընթացքով դեպքեր, սակայն անհամեմատ ավելի քիչ են։
- Կարելի է ինչ-որ չափով ասել, որ պատվաստումներից հետո ներկա պահին գոյություն ունի իմունիտետ շատերի մոտ, որը թույլ է տալիս, որ նախ մարդը նորից չհիվանդանա և չվարակվի, երկրորդ՝ կարող է վարակվել, հիվանդանալ, բայց ոչ ծանր ընթացքով։
- Շատ կարևոր է ուշադիր լինել ռիսկի խմբի մարդկանց նկատմամբ, նրանց մոտ վարակը կարող է թոքաբորբ առաջացնել, սուր շնչառական հիվանդությունների առաջին ախտանշանների ի հայտ գալուց, հետո եթե ջերմության բարձրացումը պահպանվում է, պետք է դիմել բժշկի, ժամանակին բուժում ստանալ, ուշադիր լինել շնչառական օրգաններին։ Եթե ռիսկի խմբում չեք, ջերմաչափում, ջերմիջեցում, բայց եթե հիվանդությունը տևում է 3 օրից ավել, պետք է դիմել բժշկի։
- Կանխարգելիչ միջոցները, իհարկե, օգնում են, բայց Հայաստանում ամենալավ վիտամինը մեր միրգն ու բանջարեղենն են, դրանք շատ կարևոր են մեր իմունիտետի ձևավորման համար։
- Կոչ եմ անում պահպանել հակահամաճարակային կանոնները, օդափոխել տարածքները, ջերմաչափել, հաճախակի լվանալ ձեռքերը, դիմակ կրել՝ ըստ անհրաժեշտության, սահմանափակել մրսածության ախտանիշներ ունեցողների հետ շփումը, եթե կա մրսածություն` չշփվել ոչ մեկի հետ, օրինակ՝ չհամբուրել բարևելուց, սա շատ ավելի կարևոր է, քան քիթ լվանալը։
Հարցազրույցն ամբողջությամբ կարող եք կարդալ այստեղ
