.png)
Արդեն 4-րդ անգամ «Միքայելյան» համալսարանական հիվանդանոց է այցելել Գերմանիայի Աուգսբուրգի համալսարանական կլինիկայի թորակալ և աբդոմինալ վիրաբույժ Հոլգեր Լիստլեն։
Այցի օրակարգը հագեցած էր։ Նախապես արված հայտարարության արդյունքում որովայնային և թոքային վիրաբուժական խնդիրներ ունեցող պացիենտները դիմել են խորհրդատվության։
Հոլգեր Լիստլեի մասնակցությամբ իրականացվել են մի շարք թորակոսկոպիկ և լապարոսկոպիկ վիրահատություններ, ինչպես նաև բարդացած վերքերի վիրաբուժական բուժում՝ բացասական ճնշման մեթոդով։
«Միքայելյան» համալսարանական հիվանդանոցում գերմանացի վիրաբույժի հետ համատեղ կատարվել է նաև երկու թորակոսկոպիկ թիմէկտոմիա։
Հիվանդանոցում անցկացված գիտական լսման շրջանակում Հոլգեր Լիստլեն հանդես է եկել զեկուցմամբ՝ նվիրված թոքի քաղցկեղի դեպքում իրականացվող մինիմալ ինվազիվ վիրահատություններին։ Նա ներկայացրել է նաև թոքի քաղցկեղի սկրինինգային ծրագրերը և դրանց կարևորությունը։
Զեկույցի ընթացքում Հոլգեր Լիստլեն ներկայացրել է թոքի քաղցկեղի վերաբերյալ վիճակագրական տվյալներ, անդրադարձել սկրինինգային ծրագրերի իրականացման անհրաժեշտությանը, ինչպես նաև թորակոսկոպիկ սեգմենտէկտոմիաներին՝ ներկայացնելով համապատասխան կլինիկական դեպքեր։
Հոլգեր Լիստլեն ընդգծել է թոքի քաղցկեղի սկրինինգային ծրագրերի կարևորությունը, քանի որ դրանք հնարավորություն են տալիս հիվանդությունը հայտնաբերել վաղ փուլում, ինչը կարող է նպաստել բուժման արդյունավետության բարձրացմանը և ապրելիության բարելավմանը։
Գերմանացի վիրաբույժի հետ համագործակցությունը շարունակական է։ Պարբերական այցերից բացի՝ իրականացվում են նաև հեռավար կոնսուլտացիաներ։
