«Միքայելյան» համալսարանական հիվանդանոցի ռևմատոլոգներ Նունե Մանուկյանը, Աննա Սարգսյանը և Սոնա Մարդոյանը Աթենքում մասնակցել են «Համակարգային սկլերոդերմիայի 9-րդ միջազգային կոնգրեսին»։

Մեր բժիշկները կոնգրեսին ներկայացրել են գիտական աշխատանք, որը նվիրված էր համակարգային սկլերոդերմիա ունեցող պացիենտներին։ Վերլուծվել են պացիենտների տվյալները և համեմատվել արհեստական բանականության (AI) վերլուծության հետ։

Ստացված արդյունքները խոստումնալից են․ առաջարկվել է ստեղծել մուլտիմոդալ AI մոդել, որը որոշակի տվյալներ մուտքագրելու դեպքում կարող է վաղաժամ կանխատեսել ներքին օրգանների ախտահարման ռիսկը համակարգային սկլերոդերմիա ունեցող պացիենտների մոտ։ Սա ապագայում կարող է ունենալ մեծ կիրառություն։

Գիտական աշխատանքի ներկայացումն անցել է ինտերակտիվ քննարկումներով, հնչել են բազմաթիվ հարցեր։

Համալսարանական հիվանդանոցում կարևորում են երիտասարդ մասնագետների ակտիվ մասնակցությունը միջազգային գիտաժողովներին, որոնք նոր գիտելիքների, փորձի և մասնագիտական կապերի ձեռքբերման լավագույն հնարավորությունն են ստեղծում։