«Միքայելյան» համալսարանական հիվանդանոցում կայացած գիտական լսման թեման սուր շնչական հիվանդություններն են և դրանց բարդությունները, բանախոսը՝ Ինֆեկցիոն կլինիկայի բժիշկ-ինֆեկցիոնիստ, ԵՊԲՀ ինֆեկցիոն հիվանդությունների ամբիոնի դոցենտ Ալվարդ Հովհաննիսյանը։

Իր զեկույցում Հովհաննիսյանը խոսեց գրիպի վիրուսի, մարդու մետապնևմովիրուսի, ռեսպիրատոր-սինցիտիալ վիրուսի և միկոպլազմայով հարուցված վարակների մասին։

Բժիշկ-ինֆեկցիոնիստը ներկայացրեց ԱՀԿ-ի կողմից 2024թ․-ին վերանայված գրիպի վարման ուղեցույցը՝ շեշտադրելով յուրահատուկ հակավիրուսային բուժման ցուցումները, ռիսկի խմբերը, բարդությունները, դրանց վարումը և կանխարգելումը:

Բանախոսը անդրադարձավ սուր շնչառական հիվանդությունների ախտորոշման ժամանակակից մեթոդներին և դրանց կիրառմանը։

Գործընկերները բազմաթիվ հարցեր ուղղեցին, որոնք վերաբերում էին սուր շնչառական հիվանդությունների դեպքում հակաբակտերիալ բուժման ցուցումներին և հակացուցումներին, իմունոմոդուլյատոր դեղերի կիրառմանը, հակավիրուսային պրեպարատներով հետշփումային կանխարգելմանը։